罷課前夕

「都完左啦，仲搞咩罷課丫！？」
「算吧啦，香港無得救。」
「努力讀書，搵多個錢快D走好過啦。」
「運動已被出賣，大勢早去。」

如果”聯盟”能夠堅持埋今日；
如果我地可以早多幾日出黎；
如果大家能夠早小小有共識；
如果自已可以有更多既能力；
如果一切都唔係如果…

罷課，到左呢一刻，真係好似一件雞肋。罷，對現狀能夠做成既改變相信唔會太多；唔罷，呢個”運動”又會再一次無聲落幕。To be or not to be？

有人話，罷課可以將討論提升到一個新既層次。有人話，社會仲有更加緊急既議題值得早日討論。有人話有人話….有人話我應該要比心機讀書，將來搵份好工搵個好錢快D移民。有人話，香港已死。

有時候，我會懷疑自已一直相信既價值；有時候，我會認同應該早日妥協。有時候，我寧願發個好夢。有時候，我相信香港已死。

或者香港已死、
或者價值無用、
或者明日世界消亡，
或者或者

或者，我地仲有希望？

或者香港已死，但此刻你我未亡；
或者價值無用，但夢想始終有價。

亡逝，實乃活著之必然，正如黑暗必然之將來。
然而正如亡逝，重生確也必然再臨，正如寒冬過後之春暖風和。

功成也好、敗走亦然，明日或將徒勞無功，但我會慶幸，慶幸我曾參與。

無論如何，生我育我者，乃香江大地。盡我所能，我亦無悔矣。