嗯。

2011-2012 雪無晴 龍潔瑩 林建剛
2010-2011 3D 龍潔瑩
2009-2010 旺角站 林建剛
2008-2009 十二‧廿二 許嘉融
2007-2008 情牽會考路 林建剛
2006-2007 活在其中 許嘉融、林建剛

2012年，對戲劇學會黎講，絕對係一個好特別既年份。係學校戲劇節入面拎倒歷年最多既獎項、第一次係大會堂作公開演出等等，種種既突破，都係今年出現。作為戲劇學會既一份子，我希望大家會為此感到自豪。

戲劇學會，係聖文德其實已經有一段歷史。但係大家今日見倒既戲劇學會，其實係你地既師兄師姐呢幾年黎不斷努力既成果。一年、一年，經驗不斷不斷咁累積，演技、技巧不斷不斷咁進步，一路、一路，戲劇學會，由2006走到今年，2012。六個年頭，六個故事，對我黎講，係六段回憶。

2006年10月某個放學，阿融，一個煩到爆炸而又讀緊F.5、應該努力準備會考既人係慈雲山某個公園度同我講佢既計劃。佢話要搞劇。搞劇？哈，你咪搞囉，咪搞我就得喇。果日個黃昏，我見唔倒日落，天色灰灰濛濛，坐係公園，其實，我都係想吹下水。然後，佢講到夢想。一個關於戲劇既夢想。

其實我唔想幫佢架。我都唔鐘意做戲。呢個，係我果日個心底說話。

2006年既12月，融已經組成左一隊團隊。佢諗故事，我唔鐘意寫。結果搞左好耐，到演出之前，都未有劇本。然後我忍唔住，叫大家跟個故事大綱吹個劇一次，果一晚，我用左7個鐘頭，寫左我人生第一個劇本。佢諗、我寫，然後大家一齊努力。演員part-time後台、導演？其實都無話導唔導。我地知道，劇，要照做。

2007年2月尾，戲劇學會第二次演出。演員唔夠，我地就搵自己既同學落黎part-time。排左一晚，玩得好開心。每一個人既笑容，我都仲好記得。果次，係我愛上戲劇既第一日。
許嘉融、曾美君、黃秀文、陳凱琳呢四個名，就係因為果套劇，我永遠記住。

果一年，係第一次。

2008年，我寫左一套爛劇。講爛？其實就唔係真係咁爛既，我覺得只係技巧未夠。anyway，照做。人馬差唔多，只係阿融已經由學生，變成非學生。亦都因為呢個關係，佢無機會再次以演員既身份，踏上學校戲劇節既舞台。亦都無機會，去爭奪傑出男演員，一個有人視為豬肉獎既銜頭。

2009年，個個走晒。走晒既意思係無升到中六，而得返我一個。唔緊要，走左，唔代表離開。阿融寫劇本，我係學校做統籌，Sandy、圓、翹、陳良仔等等加入劇組。人數唔夠、經驗不足，我刻意開辦既所謂「戲劇訓練班」，呃左好多想入戲劇既人。包括Hayley，包括Lung Kit Ying。2008年，十二‧廿二，一個幾特別既故事。再一次，我地演出成功。作為一個客串，阿融比左個機會我，去拎傑出男演員。2008年，阿融仍然以非學校人士既身份，幫手搞戲劇。

2010年，因為我參加左傑出演員訓練班既關係，我用左同訓練班一樣既方法，寫左旺角站。果一次，我用左好多新演員，用左好多心機去處理大家。但我無呢個能力。阿融，繼續犧牲佢返工既時間幫我排劇。而曾美君、陳凱琳，兩個你地可能聽都未聽過既人，返左黎幫手化妝。果日演出完，我同融準備左每人一枝向日葵。作為師兄，我同融都好希望大家可以好似向日葵咁，面向光明。而果本場刊，我仍然放左係我床頭。雖然入面既演員，好多都已經離開左。

2011年，我都離開左聖文德。呢一年，融為左比多D機會大家演出，重演左活在其中。然後，我地不得不退落去。最後，演出之前，Sandy用左佢寶貴既讀書時間幫龍潔瑩佢地排舞排劇。而呢一年，亦都係我唯一唔在場既一年。

2012年，雪無晴。相信大家對呢一年都好清楚，我都唔講太多。但係今年，我地終於走左入大會堂。作為一個觀眾，我係台下面睇得好開心。作為其中一個導演，我又好緊張。作為編劇，我驚出狀況。作為一個師兄，我希望大家有場Good show。果晚Sandy專登返黎支持我地。掌聲，係屬於你地既，我好清楚。你地做左場Good show。唯一最令我失望既，係我唔見左部電腦。電腦入面有相、有劇本，有我好多既故事，有好多我好重要既野。無論我有幾多錢，我都買唔返。係屋企，屋企人問我付出咁多為咩。係學校，同學問我點解要幫到盡。係房，我喊，我唔明白，點解。然後，我諗起一個人。

有一個人，每年，即使唔係學生，即使無收過學校一分錢，佢都會返黎。每一年，佢就不斷為每個演出出錢出力。佢無接受過好正式既戲劇訓練，但佢有心，比我地每一個都有心。佢付出時間、付出精神。佢要面對屋企人既反對，要面對工作既壓力。無咩錢，但佢有夢想。佢堅持，但永遠得唔到回報。 2012年，係佢講得最多失意說話既一年。佢同我講，係《雪無晴》學校演出之後，佢坐左係度。無人理佢，甚至有人問佢做咩坐係度。「你好想我走？」「係呀！」呢一個，係佢得到既答覆。一步一步、一年一年，戲劇學會已經由佢既夢想，變成人地既夢想。係劇場上面既歡笑聲，已經再唔屬於佢。默默離去。失望。痛心。2012年某個晚上，佢同我講，佢唔想再返去。

一年、一年，一步、一步，戲劇學會越走越遠，經驗越黎越多，目標亦都越黎越大。的確，係好事黎。但有D野，比贏得冠軍重要。有D野，比戲劇重要。

寄語13，但願大家多點關心，多點愛。戲劇之所以吸引，台下掌聲係原因之一。但愛戲劇，首先，要愛人。

但願各位係為獎項豐收既一年，都停一停、諗一諗。每一套劇，背後都有個更加好睇既故事。每個人都係個故事入面有個角色。而又有無一個角色，你地係忽略左架呢？
時間繼續流逝，青春於我已經不再。但願仍有夢想的你們，學懂珍惜那些肯為你燃燒青春的人。